2014 წლის ოქტომბერში, ფონდი კრისტალის მხარდაჭერით, ბიზნესისა და ეკონომიკის ცენტრმა (BEC) საქმიანობა განაახლა პარლამენტში, როგორც საკანონმდებლო დიალოგის დამოუკიდებელმა პლატფორმამ, რომლის მიზანია ეფექტური და პროგნოზირებადი ეკონომიკური კანონმდებლობისა და ხელსაყრელი ბიზნესგარემოს შექმნის ხელშეწყობა საქართველოში, ინკლუზიური ეკონომიკური ზრდისთვის. ფონდის მხარდაჭერით, BEC-იმ აღადგინა ასევე თანამშრომლობა ბრიტანულ ასოციაციასთან – „ბიზნესისა და პარლამენტის საერთაშორისო დიალოგი“ (EPDI) და საფუძველი ჩაუყარა გამოცდილების გაზიარების საერთაშორისო პროგრამებს.
2015 წლის სექტემბერში, ცნობიერების ამაღლების ერთწლიანი წარმატებული კამპანიის შედეგად, ბიზნესისა და ეკონომიკის ცენტრმა გამართა პირველი სტრუქტურირებული და ინკლუზიური საჯარო-კერძო დიალოგი (PPD) საქართველოს პარლამენტში, პარლამენტის თავმჯდომარესთან კოორდინაციით, სამოქალაქო კოდექსში შესატანი ცვლილებების განსახილველად, რომელიც ეხებოდა სასამართლოს გადაწყვეტილების გარეშე, საპოლიციო წესით, უძრავი ქონებიდან პირთა გამოსახლების შეზღუდვას.
ამ პერიოდისთვის, საჯარო და კერძო სექტორებს შორის ეფექტური დიალოგი (PPD) საქართველოში ძირითადად წარმოადგენდა გამონაკლისს, ვიდრე წესს. 2015 წლის დეკემბერში, ფონდი კრისტალისა და EPDI-ის მხარდაჭერით, BEC-იმ შეიმუშავა PPD-ის ახალი მეთოდოლოგია და 2016-2018 წლებში, პარლამენტში დააფუძნა და გააძლიერა საჯარო და კერძო სექტორებს შორის დიალოგის დამოუკიდებელი და მუდმივმოქმედი პლატფორმა, USAID-ის პროექტის – მმართველობა განვითარებისთვის (G4G) მხარდაჭერით.
ბოლო რამდენიმე წლის განმავლობაში, BEC-ის PPD მეთოდოლოგია გამოყენებულ იქნა მმართველობის პრაქტიკის გასაუმჯობესებლად და ეკონომიკური პოლიტიკის არაერთი საკითხის, ფართომასშტაბიანი რეფორმისა და კანონპროექტის განსახილველად, მათ შორის: მიწის რეგისტრაციის რეფორმა, საპენსიო რეფორმა, კაპიტალის ბაზრის რეფორმა, რეგულირების გავლენის შეფასების (RIA) სისტემის ინსტიტუციონალიზაცია საქართველოში, გადახდისუუნარობის რეფორმა, მწვანე ეკონომიკა, ენერგოეფექტურობა, სატრანსპორტო პოლიტიკა, წყლის რესურსების მართვა, ელექტრონული კომერცია, და სხვა.
ფონდის მხარდაჭერით, ბიზნესისა და ეკონომიკის ცენტრი (BEC) ეფექტურად ფუნქციონირებს საქართველოს პარლამენტში, რათა ხელი შუეწყოს გამჭვირვალე ურთიერთობის დამყარებას და ეკონომიკურ საკითხებზე კონსტრუქციული საკანონმდებლო დიალოგის განვითარებას ბიზნეს სექტორს, სამოქალაქო საზოგადოებასა და საქართველოს პარლამენტს შორის. BEC-ის ძირითადი მიზნებია: (1) კერძო სექტორისა და სამოქალაქო საზოგადოების მონაწილეობის გაზრდა კანონშემოქმედებით საქმიანობაში; (2) ორმხრივი ურთიერთგაგების მიღწევა პოლიტიკოსებსა და იმ პირებს შორის, რომლებზეც უშუალო გავლენას ახდენს მიღებული გადაწყვეტილებები; და შესაბამისად, (3) ბიზნესისა და ეკონომიკის შესახებ პოლიტიკოსების გადაწყვეტილებების ინფორმირება.
გრძელვადიან პერსპექტივაში, კონსტრუქციული და შედეგზე ორიენტირებული საჯარო-კერძო დიალოგის განვითარებისთვის BEC-ის, როგორც დამოუკიდებელი, არალობისტური და კროს-სექტორული პლატფორმის მხარდაჭერამ, მნიშვნელოვანი წვლილი შეიტანა არაერთი მიმართულებით, კერძოდ:
ამჟამად, ბიზნესისა და ეკონომიკის ცენტრის საპარლამენტო დიალოგის პლატფორმა საქმიანობს ფონდი კრისტალისა და საქართველოში ამერიკის შეერთებული შტატების საელჩოს მხარდაჭერით, პროექტის ფარგლებში – „მონაწილეობითი საჯარო-კერძო დიალოგის განვითარება ინკლუზიური ეკონომიკური ზრდისთვის“. პროექტი მიზნად ისახავს ეკონომიკური პოლიტიკის შემუშავების პროცესში დაინტერესებული მხარეების ჩართულობის ხარისხის გაუმჯობესებას, რაც თავის მხრივ, ხელს შეუწყობს ქმედითი რეფორმების გატარებასა და შედეგად საქართველოში საინვესტიციო კლიმატის გაუმჯობესებას; კერძო სექტორისა და სამეწარმეო გარემოს განვითარებას; და ასევე, პასუხისმგებლიანი და ანგარიშვალდებული ეკონომიკური მმართველობის ჩამოყალიბებას.
